¿Qué seriones, que formales
tan los neños de La Calzada…!
¿Cómo escuchan los probinos
a la xente qu´aquí fala!

¡Ay! Que guapos rapacinos
que no gorguten migaya.
¡Ay! si agora un paxu piescos
per aquí s´esparramara…
¡adiós! con el cuartu seriu
de la tropa ´sgalazada
per pañar un piescu verde
y royelu hasta la gaspia
o pevita, ye lo mesmo,
el güen diente tóo lo blandia

¿Y si fueren cirigüeñes,
manzanes, cereces?…¡mialma
si nel suelu queda una
que non seya ´sgatuñada!
¿Doivos dentera moninos?
¿Faisevos la boca agua?

Perdonaime, tóo ye groma
Del magüetu que vos fala.
¡Ay, probinos! pa utra cosa
esta fiesta fue ´ntamada.

Paxaros, flores y neños
facen reviciar el alma
fuxendo llercies, llaceries,
dolor, llantu, pena, llácara
y semando d´allegríes
la vida que ye una llárima.

Cántigu que na ´spesura
saltarín paxuru ´ntama
llanciando al sol gorgorinos,
pa la fema ´namorada;
arume de belles flores
na solez de la ´nramada
que ´l vientu sele lu lleva
y suavin muy suave lu aña;
caricies del guapu neñu
que na so melosa fabla
faínos rir a tutiplén
y de oyelu cai la baba…

Son querencies de la vida,
ye amor, poesia, alma,
ye ´l sentir de los humanos,
ye vevir la paz y calma,
ye tóo xunto l´allegría
que del cielu vien per gala.

¡Ay, probinos los mios neños
rapazos de la Calzada!
Ya tenéis vuestru xardín
onde reblincar con gana;
ya tenéis flores y árboles
que sol, mar y brisa baña…
Sois felices, muy felices
ena inocencia del alma.

Si algún día, yo, vieyín,
(non en balde ´l tiempu pasa)
cimbláu co la carga a cuestes
que los años sofitara
tembleque, mediu cieguín,
con el alma atristayada
de sufrir y padecer,
de luchar na vida amarga,
subiera a rastraes los pies
fast´aquí, fasta la Calzada,
dexáime tomar el sol
nel xardín de la neñada
al par de les belles flores
ena querida barriada,
mientres blincáis, xunto a min
riyendo con toa la gracia
y los páxaros allegres
canten amor y esperanza…

¿Dexareisme miós neñinos,
rapazos de la Calzada?